Am 22. Juni 2024 isch s Fit&Fun Mixed mit drüne Wohnwäge vo Inkbu us loszoge as Regionalturnfest Ettinge. Dört acho hei mir üsi Schlofplätz ufere Quartierstross vorem Hus vomne nätte öutere Herr, wo sofort gluegt het, dases üs ah nüt fäut, dörfe ufstöue. Und de isches ouscho losgange ah Wettkampf. Düre Räge si mir zum Wettkampfplatz füre Fachtest Allround is Nochbersdorf Therwil gloffe. Scho chli nass hei mir de iturnet und üs mit de angere Vereine ungers Vordach vor Turnhalle kuschlet. Am 14:06 hets de ärnscht goute. Uf dr schlammige Alag hei gsamthaft 18 Lüt vom Turnverein Inkbu die zwöi Ufgabe vom Fachtest Allround mit vouem Isatz unger erschwärte Bedingige absolviert. Üse geschetzt Fan isch säubschtverständtlech ou derbi gsi und het üs ghoufe am Räge z trotze – ah dere Stöu härzleche Dank ah di Woufi!
Nachem Wettkampf und ufem Wäg zrugg zude Wohnwäge hets de no dr eint oder anger Toucher i Glunggene gäh. Zum Glück isch s Wätter när dütlech besser worde und mir si nachem Düschele troche blibe. Überraschend het es Outo bi üsem Campingplatz ghaute und üs ä Chischte super feini Chriesi gäh. Die hei mir natürlech is Apéro u de am nöchschte Tag i üses Zmorge integriert. Nachem Apéro ischs de witer zum Znachtässe gange und spöter is Feschtzäut. D Bänk si zwar nid so geeignet gsi fürs traditionelle Ufesto, aber trotzdäm heimr es sehr guets Fescht gha. Am nöchschte Morge hets de natürlech s mitbrochte feine Zmorge inklusive Chriesi gäh. Nachdäm het sech ä Teil vo üs ufe Heiwäg gmacht. Dr anger Teil het none Wohnwagepanne müesse flicke, bevors für si ou heigange isch. Aues i auem heimr trotzem schlächte Wätter am Turnfescht ä super Zit gha und fröie üs schowider uf die nöchschti Saision!
Alina Filardi